Pag 267

De morte Phylippi regis
Quidam de exercitu dixit Alexandro: "Rex Alexander!
Philippus, pater tuus, mortuus est in campo. Alexander hoc
audiens eumque conspiciens cepit amarissime flere. Et intuens
eum, Philippus dixit: "Alexander! Iam letus morior, quia occidendo
interfectorem meum acutam uindictam de me sumpsisti."
Et hec dicens continuo expirauit. Plorans Alexander mortem
Philippi ipsumque secundum morem imperialem sepeliri fecit.
Quomodo Alexander congregauit multitudinem populi post
mortem Phylippi etc.
21. Alio autem die sedit Alexander pro tribunali in solio
patris sui et conspecta multitudine populi sic affatur: "Viri Macedones,
Traces, Thessalonicenses seu Affrici! Inspicite figuram
Alexandri, et fugiat a uobis omnis timor omnium barbarorum!
Illic siquidem sic diuino culmine adiuuante subiugabo uos
et imperio nostro submittam, ut non barbari, sed Greci memoriam
armorum gloria commendent. Si quis ex uobis arma non
habet, tollat de palacio meo et preparat se ad pugnam. Et qui
habet, ex armis suis muniatur" Audientes hoc, senes principes
et milites responderunt dicentes: "Rex Alexander! Tempore
magno militauimus cum Philippo, patre tuo, et nunc non est
uirtus in corporibus nostris, ut ferre ualeamus angustias preliorum,
quia etas nostra iam in senectute posita est. Vnde, si placet,
potes eligere iuuenes principes, qui possint angustias
preliorum sustinere et miliciam, quam hactenus recusamus."
Respondit eis Alexander: "Magis diligo senum grauitatem quam
uelocitatem iuuenum improuisam, quia solent iuuenes mortem
recipere in iuuentute sua nimium confidentes. Senes autem
omnia cum consilio faciunt semper de periculo tytubantes." Hec
eo dicente omnes ceperunt sapienciam eius unanimiter collaudare
acquiescentes sapiencie sue etc.
Quomodo Alexander expugnauit Calcedonem
22. Post aliquot uero dies congregato exercitu et multitudine
preparata cepit Ytaliam nauigare, et ueniens Calcidoniam
expugnauit eam. Calcidones uero super muros ciuitatis ascendentes
ei fortiter resistebant. Quibus Alexander ait: "Vobis dico,
Calcidones, ut pugnetis uiriliter aut potestati subiugamini pugnatorum."
Verumtamen Calcidoniam apprehendit. Exiens inde et
nauigato pelago ingressus est Ytaliam uolens superbiam Romanorum
refrenare. Consules uero Romanorum audientes aduentum
Alexandri ualde sunt timore perterriti, et congregato populo
auri talenta sexaginta milia, coronas centum aureas direxerunt
Alexandro supplicantes, ut nullatenus expugnaret. Alexander