ex Romualdi discipulis constituto et fratribus aggregatis, cepit
eos Romualdus sub magna tenere custodia et docebat eos sub regulari
vivere disciplina. Pręcepit etiam abbati ut in heremum
secedens per totam ebdomadam in cella consisteret, diebus vero dominicis
fratres ad monasterium veniens visitaret. Qui sancti
viri iussa contempnens cepit seculariter vivere et pede operis semel
exorbitante a rectitudinis tramite iam longius declinare. Videns
ergo Romualdus quod secundum suę voluntatis ardorem ibi laborare
non posset, regem protinus adiit, et acceptę promissionis exactor,
ut rex monachus fieret insistere vehementius cepit. At ille facturum
se quidem quod exigebatur asseruit, si tamen prius Romam,
quę sibi rebellabat, inpeteret, et ea devicta Ravennam cum victoria
remearet. Cui Romualdus: «Si Romam», inquit, «ieris,
Ravennam ulterius non videbis». Et apertissime illi mortem propinquam
esse denuntians, quia eum revocare non potuit,
procul dubio de eius certus interitu dum rex Romam properat,
Romualdus navim ascendens ad civitatem Parentium transfretat.
|
1
5
10
15
|