4
Stipendia vero militaria, vel quidquid ex conventione seu promissione
dandum esset, incunctanter persolvebat. Numquam
vero quod daturus, vel dandum non esset, polliceri volebat.
In faciendis non preceps existebat, sed priusquam eorum quid
inchoaretur, semper providentie oculo premuniri studebat. Neminem
quoque ex preiudicio puniri vel sua auferri querebat. Cui
vero aliquid pro merito bonum vel malum promitteret seu
comminaretur, firmum ratumque erat. Sed et hoc in eo erat
valde mirabile, quia cum in hostem positus esset, ita provide bellica
acta disponebat, ut semper et ubique sine sanguinis effusione
superans, exercitus etiam sui vitaret discrimen. Erat autem
et in loquella velox, prudentia pollens, consilii gravitate preditus,
sermone luculentus atque repentinis responsionibus semper
sapienter respondere paratus. Sed quia familiaritas solet parere
contemptum, ita ipse publice et privatim in familiaritate vel affabilitate
seu iocunditate habebatur modestus, ut numquam etiam
desisteret timeri. In tantum enim profuit metus ipsius, ut de
cunctis, Deo cohoperante, regni sui finibus, omni penitus eliminata
iniquitate, non nisi que iustitie et pacis erant, sectarentur.
Ita ut illud Psalmiste in eo videretur compleri: "Iustitia et pax
osculate sunt".
5
Quoniam ergo egregios mores disserentes paulo longius
evagati sumus, nunc ad narrationis ordinem stilus revertatur.
|
|