d. Conmissio super certam articulum.
Gotfridus archydiaconus lewenensis, domini pape iudex
delegatus, provido et discreto viro . . salutem in domino
sempiternam.
Cum in causa quam P de . . movet seu movere intendit
R loci eiusdem super . . re auctoritate apostolica
coram nobis, in qua per procuratores usque ad litis contestacionem
sollempniter est processum, petatur instanter
a nobis ut — parcentes laboribus parcium et expensis — alicui
discreto viro vellemus conmittere, quod a principalibus
personis calumpnie iuramentum reciperet, et posicionibus
hinc inde faceret responderi, nos ipsorum precibus annuentes
vobis auctoritate qua fungimur de utriusque
partis assensu tenore presencium conmittimus et mandamus,
quatenus iuramentum calumpnie super libello exhibito,
quem vobis mittimus presentibus interclusum, ab
ipsis principalibus personis recipiatis sollempniter prima
die iuridica post festum omnium sanctorum proxime venturum,
quem diem ipsis partibus ad dictum iuramentum
prestandum pro peremptorio termino duximus assignandum,
et posicionibus quas ipse partes hinc inde facere voluerint
faciatis ut iuris est plenarie responderi, iuramentum ipsum
et posiciones, si quas fecerint, cum responsionibus subsecutis
ad eas in publicam scripturam redactas sub sigillo nostro
una cum presentibus et libello predicto nobis
quam cicius remittentes, necnon prefigentes eisdem partibus
peremptorium terminum conpetentem quo sufficienter
conpareant coram nobis, in causa quantum de iure
fuerit processure.
Datum etc.
|
|