Adsint collo cum inflato filii superbię ,
Eos quidem consequatur phalanx linguę tertię
Et fatuitas, quę caret spiritu sollertię.
Nec hypocritarum desit biceps satellicium,
Qui simplicibus illudunt per falsum cilicium
Et, ut sancti videantur, ungunt capillicium.
Veniant omnes latrones, mendaces et subdoli,
Baratrones et periuri, rapaces, adulteri,
Et paterno qui non timent interesse funeri,
Et velatas qui usurpant, quod est exsecrabile,
Et qui fiunt Sodomite, malum detestabile,
Et quicumque fornicantur, pus intollerabile.
Si qui forte commiserunt dictu horribilia,
Sicut culleo consuti protestantur hylia,
Cicius introducantur ut cara familia.
Omne scelus, omne crimen intrent in hec moenia,
Traditores huc accurrant velut ad hencenia,
Et quicumque desperantur, quod est sine venia.
|
|