Otto Morena et continuatores: Historia Frederici I

Pag 153


Proxima vero die dominica venerunt trecenti milites
Mediolani ad ipsum imperatorem in prefato pallacio. Inter
quos fuere triginta et sex vexilliferi, qui vexilla in manibus
imperatoris tradiderunt osculantes ipsi pedem. Ibique fuit
Guintelmus magister Mediolanensium ingeniosissimus, et
in quo maximam spem habuerant Mediolanenses; et claves
civitatis imperatori tradidit in signum tocius civitatis. Omnesque
tam vexilliferi quam alii iuraverunt, quod ulterius bona
fide et sine fraude observabunt omnia mandata, que fecerit
eis dominus imperator vel eius certus missus tam de personis
suis quam de civitate. Ibique precepit imperator consulibus
Mediolani, quod ipsi adhuc facerent venire omnes illos, qui
fuerunt consules Mediolani a tribus annis retro, et etiam partem
peditum Mediolanensium.
Igitur in proximo die Martis venerunt quasi mille pedites
Mediolani cum carocio suo et vexillo maximo supra carocium
atque cum nonaginta quattuor aliis vexillis. Que omnia
imperatori tradiderunt ac duas tubas, que habebant, in signum
tocius reipublice Mediolani. Omnesque prefato modo iuraverunt.

1



5




10




15



Torna all'inizio