mortuo vero Enrico imperatore, Pandulfus de custodia
fugiens Capua revertitur; sed cum a Capuanis non reciperetur,
venit in montanis istis,et undecumque sibi posset colligere
milites, qui adiuvarent eum. iam tunc hii, qui dicebantur filii
cuiusdam Borrelli, ceperant habitare iusta Sangri fluvium. habuerant
et isti originem ex Balvensi comitatu. quibus iunctus, multa
dona, que non debebat promittens die quadam, incumbentibus tenebris,
aggressi sunt turrim monasterii huius, et fratres exterriti
omnes dispersi sunt. illi vero monasterium omne depredantes,
epulabantur per aliquot dies. tunc venerabilis abbas Ylarius, hoc
audito Capue, magnis precibus optinuit a domno Guaymario principe,
qui direxit illuc Raynulfum comitem, conductis Normannis et
Capuanis. quibus cum predicto abbate venientibus, predicti sacrilegi
raptores fugati et dispersi sunt. non certe contigerat huic monasterio
similis tribulacio a tempore Sarracenorum! Conradus rex
Italiam venit et Rome coronam accepit. iste, Capuam veniens,
predictum Pandulfum iterum exiliavit, et illustrem virum Guaymarium,
Capue et Salerni principem ordinavit, qui multa bona ecclesiis
Dei contulit. obiit autem venerabilis pater Ylarius, post multis
bonorum operum certaminibus, tercio kalendas octubris, anno Dominice
incarnacionis millesimo quadragesimo tercio, indiccione terciadecima.
[c]uius corpus sacrum, ante ecclesiam domini Salvatoris,
precioso sepulchro locatur. de hoc venerabili patre diversa
miracula scripta repperimus; quedam eciam oculis nostris vidimus,
cum ad eius corpus plures sanarentur diversis egritudinibus. In
Casino vero Iohanne, duodecim annis peractis, Atenulfus preficitur.
|
|