19. Isaias audet . Isaias, inquit, pro Judaeis non
dimisit quid bonum gentibus, quod futurum erat, et
malum quod Judaeis futurum erat, praediceret.
20. Expandi manus meas . Vel manus in cruce
extensas dicit, vel potius opera quae inter Judaeos
Dominus operatus est.
CAP. XI.—1. LANFR. Electio autem . Non secundum
merita.
2. Spiritum compunctionis . Malam compunctionem
hic significat, qua saepe fit ut etiam bonum
homini sit molestum.
2. Fiat mensa eorum in laqueum . In laqueum et
in caetera quae sequuntur facta est Judaeis Scriptura
ipsorum, quam male intellexerunt. Scriptura autem
mensam vocat, quia intelligentibus panis est
animae.
3. Nunquid sic offenderunt? An, inquit, peccatum
eorum, tantummodo operatum est casum animae
eorum?
4. Ut illos aemulentur . Hoc saepe factum est, et
plenius fiet in fine saeculi quando Judaei Christianos
persequentur in fide Christi. Potest etiam intelligi
ut gentes Judaeos aemulentur, id est ut credant, sicut
et ipsi credebant. Vel ut Dei aemulatione circa opera
eorum mala moveantur.
5. Quod si delictum illorum . Delictum Judaeorum
ditavit mundum, quia nisi ipsi Dominum crucifixissent,
crux Christi, et resurrectio, et ascensio ejus
praedicata et credita in mundo non esset.
6. AMBROS. Diminutio eorum . Diminutio vel amissio
eorum est, damnum promissionis, per quod
gentes lucratae sunt vitam aeternam.
7. LANFR. Diminutio eorum . Diminutionem Judaeorum
vocat apostolos, quia illis discedentibus ab
infidelitate eorum; populus ille in sua infidelitate
persistens, ex quadam parte mansit diminutus.
|
|