Ubi est similitudo, quam feci in homine?
Depravata est moneta meo sculta nomine.”
O quam durus est hic sermo, rex aeternę, domine !
„Non habetis ita sanum, sicut dedi, cerebrum.
Destinavi vobis cęlum, vos itis ad Herebum,
Et pro melle scripturarum bibistis elleborum.
Et de vobis feci papas et Romanos cesares,
Presules et dignitatum diversarum proceres,
Et vos petitis inferni me contento carceres!
Num idcirco principatus rerumque divicias
Contuli, ut emeretis Sathan amicicias,
Et cum eo lueretis perhennes tristitias?”
Tortum est pro benefactis malefacta reddere
Nec dignum servire mundo et deum offendere,
Redite, deus non spernit nec vult quemquam perdere.
Redimenda sunt peccata fletu penitentium.
Reponamus, quę habemus, sinibus egentium;
Terga dabit hostis noster, rex superbientium.
Vobis loquor, o potentes, qui splendide vivitis,
Si quid forte comisistis, quare non redimitis?
Date, date relictura, sic in cęlum ibitis.
|
|