adorare ydola sinerentur, que causa ut Iudaicus populus ad eandem recurreret
cecitatem, quinimmo que causa fuit ut Assur virga furoris Domini et cetere
gentes infideles domarent superbiam Israel, ut saltim flagellatus disceret humilibus
consentire. Futurum tamen est ut idem populus Sarracenorum, qui modo
datus est flagellum populo Christiano, convertatur ad Deum eo tempore quo et
populus Iudeorum, sicut quondam conversus est populus Romanus, qui aliquando
datus fuit in flagellum filiis Israel. Unde et Apostolus dicit: Conclusit Deus
omnia in incredulitate ut omnium misereatur .
BENEDICTUS: Si causa ipsa daretur, cur hoc voluerit iustus et equus Deus,
sedato cordis scrupulo cessaret utique motio mentis. Quia vero non patet causa
rationis, eo movetur animus in iudiciis creatoris quo non invenitur profuisse aut
prodesse pereuntibus successorum salutem. Neque enim sicut unus homo qui
curatur a cecitate sua vilipendit preteritam cecitatem, ut ita possit quicumque
populus parvipendere preteritam infidelitatem quando recipit fidem, quasi totum
curatum sit quod cecum fuerat, et non potius dolere filii de parentibus suis qui
in cecitate fuerunt et perierunt?
IOACHIM: Quia se filios Dei omnipotentis esse credunt, electi non curant de
reprobis parentibus qui genuerunt eos secundum carnem, si electi non sunt.
Ceterum si omnes christiani diligerent exhibitam sibi lucem et fidem operibus
non negarent, durum valde videretur quod Deus aliquos populos in cecitate
relinquid. Set quia superbiam christianorum videmus cotidie ascendere usque
ad celum et non iam aliquos et aliquos homines, set innumeras turmas populorum
eorum qui christiano censentur nomine dolemus descendere ad inferna, misericordie
potius esse videtur quam iudicii quod aliquos populos Deus in cecitate
relinquid.
BENEDICTUS: Vera modis omnibus esse probatur terribilis illa sententia
Salvatoris qua dicitur: multi sunt vocati, pauci vero electi . Set quia causa iusti
iudicii Dei in obcecatione reproborum inventa est esse superbia, putamusne in
tanta multitudine infidelium non esse aliquos aptos ad vitam, secundum quod
forte claruit illis de quibus dicitur: Que stulta sunt mundi elegit Deus?
IOACHIM: Si omnia que stulta sunt mundi et que ignobilia et contentibilia
esse videntur eligeret clemens Deus, cum inter ipsa contemptibilia plerumque
|
|