Petri Cantinelli: Chronicon

69


Item, eodem anno, die iovis XIII mensis marcii, dominus Maghinardus de Sosenana capitaneus
civitatis Faventie, una cum militibus et aliquibus de populo eiusdem civitatis, duxit comitem
Aghinulfum et Ubertum eius filium captos, extraens ipsos de ipsa civitate Faventie, et
posuit eos in castro seu turri de Calamello, sub fida et bona custodia. Item, die veneris sequenti,
statim equitavit idem dominus Maghinardus, cum gente sua predicta et fidelibus et amicis
suis, ad quoddam castrum, quod vocatur Monteflore, quod castrum et turrem seu fortilitiam
habuit ad sua mandata, et omnes, qui erant in eo. Et erat dictum castrum Burnioli de Canpalmonte
et consortum suorum.
Item, eodem tenpore, die iovis XXVII mensis marcii, dictus dominus Maghinardus, cum
quantitate militum et peditum de Faventia, equitavit Forlivium. Et, eodem die, una cum Liviensibus,
equitaverunt Imeldolam, et ceperunt ipsum castrum Imeldole, ipsumque bene et
fortiter inforciaverunt et munierunt.
Item, eodem anno, comune Forlivii, comune Faventie et comune Ravenne contraxerunt
societatem ad invicem, et facte fuerunt promissiones, per sindicos instructos, de adiuvando se
invicem comunibus expensis.
Item, die sabati XXIX eiusdem mensis, incepto quodam rumore in civitate Imole, omnes
traxerunt ad arma, et tandem expulsus fuit potestas dicte terre, qui fuerat ibi positus
per dominum comitem Romaniole, qui vocabatur dominus Nuce de Castello. Et electus fuit
potestas Imole Bernardinus filius olim comitis Bernardini de Cunio, et de expulsione predicta
liberatum et absolutum fuit comune Imole, et omnes illi, qui culpabiles de hoc fuerunt,
data quadam summa peccunie predicto domino Nuce, et rebus eius restitutis.
Item, die IV mensis aprelis, obiit dominus papa Nicolaus in urbe Romana, et fuit in die
veneris sancto.
Item, eodem anno, die XVI mensis aprilis predicti, supradicta comunia, cum eorum exforcio
undecunque congregato, equitaverunt, pedes et eques, usque ad civitatem Cesene, et
ibidem, ante pontem, fecerunt acies suorum militum et peditum congregari contra dominum
comitem Romaniole et gentem suam, quam habebat in dicta civitate. Et nullus ausus fuit ire
ad eos, et eadem die redierunt Forlivium.
Item, eo anno, die martis penultima mensis aprilis, dominus Maghinardus capitaneus populi
Faventie, cum aliquibus ex populo et ex militibus ipsius civitatis, equitavit ad montana, et posuit
exercitum ad quoddam castrum, quod vocabatur Sanctus Cassianus, in valle Alamonis; quod castrum
tenebat comes Alexander de Romena pro uxore sua domina Katerina filia condam domini
Ugolini Fantullini; et stetit in dicto exercitu V diebus, iactando cum manganellis lapides in ipso
castro, in quo erant bene CC persone inter mares et feminas et pueros; et, propter indigentiam
aque, quam non habebant, nec habere poterant, reddiderunt ei castrum, et venerunt ad
mandata comunis Faventie et ad plenam iurisdictionem dicti comunis; et fecit ipsum castrum
et omnia fortalicia eius et omnes muros dirrui, et lapides proici inferius de monte.
Item, die nono mensis madii, dominus Maghinardus predictus, cum aliquibus militibus de
Faventia et de maxenata, equitavit et extraxit de castro et turre Calamelli dominum comitem
Aghinulfum de Romena, et accepit duos filios ipsius comitis Aghinulfi obsides pro eo, videlicet
Guidonem et Rogerium; et Ubertus erat senper captus in dicta turre Calamelli: ipse enim
comes promisit tractare pacem et concordiam inter dominum comitem Ildebrandinum fratrem

Torna all'inizio