Petit devotus a … nobili accomodari sibi braccum ad leporum inventionem
instructum.
Excellentie vestre nobilitas, per universas regni partes et ultra manifeste
diffusa, non solum notis verum etiam innotis semper extitit liberalis,
de cuius munificentie ab experto largiflue et nobis grate, quam semper
inveni benivolam, liberalitate confisus, dominationi vestre suppliciter porrigo
preces meas, quatenus quemdam braccum instructum ad inventionem
leporum et ad hoc naturaliter gratiosum mihi dignemini accomodare, si
placet, ut de devoto et prompto me proinde faciatis tam ad vestra et vestrorum
servitia, quam ad singula que vobis placere debeant promptiorem.
Amicus … amico.
In bracco transmisso non minus mittentis gratitudinem, quam missionis
effectum consideravit amicus, dum de petita specie, licet defuerit virtus
idemptitatis in numero, rogantis desideriis satisfacere voluistis. Ex hoc
siquidem dilectioni vestre regratior, sed tamdiu gratiarum efficacia relativa
suspenditur, quousque prede succedentis utilitas ex investigatoris industria
comprobetur.
|
|