LVII. De institore et asino.
Dum fora festinus lucro petit, instat asello
Institor et pressum pondere fuste premit.
Ille necem sperat, nece promittente quietem,
Sed nece completa, uiuere pena potest:
Nam cribella facit et tympana pellis aselli,
Hec lassatur et hec pulsa tonante manu.
Cui sua uita nocet, caueat sibi rumpere uitam.
Non nece, sed meriti iure quiescit homo.
|
|