16

unde Grecorum imperator magnam tristitiam habuit. Hec victoria et recuperatio fuit anno
Domini MCLVI, in mense Madio et Iunio.
A.D. MCLVI. In consulatu Cocci, in mense Iulio et Augusto, Pisani Consules fecerunt
barbacanas circa civitatem Pisanam et Kinticam, et inceperunt civitatem murare, et
compleverunt murum civitatis a turre, ubi posuerunt leonem marmoreum usque ad turrem
que est super pontem Ausaris. In secundo anno, in mense Februario et Martio et Aprile
MCLVII circumierunt totam urbem Pisanam et Kinticam ligneis turribus et castellis et britischis
pro timore Frederici regis Romam venientis.
A.D. MCLVII. In consulatu Cocci, in mense Apreli, usque ad kal. Ianuarii, muraverunt
tribus pontibus civitatem super terram, et uno ponte sub terra a Sancto Zenone ab
Ausare usque ad portam Calcisanam, et fecerunt foveas a Monte Pisano usque ad Sanctum
Zenonem; per quas petras pro muris navigio duxerunt, et in eodem anno negotia civitatis
et iustitiam viriliter tractaverunt.
A.D. MCLVII, octavo kal. Aprelis, natus est puer in comitatu Bononie cum barba et
dentibus, et pilosus totus, in Veneris die Sancto. In eodem anno, prid. kal. Augusti, cecidit
grando maxima super terram Bononie, que devastavit vineas et arbores, homines et pecudes
interfecit; que varii generis, quadrata, rotunda, et cornuta; cuius magnitudo erat tanquam
magni ovi anseris vel galline.
A.D. MCLVII, XII kal. Madii. Incepta est turris Melorie, et totus girus est expletus
in consulatu Cocci, et ipse complevit et fecit: in sequenti anno complete est turris eius.
A.D. MCLVIIII. Coccus consul duas turres in estate in portu Magnali incepit et
fontem ad Sanctum Stefanum de portu Pisano pro utilitate marinariorum ordinavit et munivit.
A.D. MCLXIII. Turris de Magnali portus Pisani conpleta fuit ex parte Livorne,
mense Novembris.