sue genuerunt designat, secundus filios secundi status
baptizatos in Christo, tertius, eos qui futuri sunt tertio statu a
tempore plenitudinis gentium? Sed et fuga Iacob a facie Esau
fugam christiani populi designat, qua fugiit a facie Iudeorum et
pervenit ad Gentes. Quod autem nato Ioseph preparavit se ad
patriam redire, designat electos sollicitari oportere de salute Iudeorum,
tempore quo consumatus fuerit ordo quem designat Ioseph.
Transitus ergo Iacob, transitum secundi status ad tertium,
laboriosi, videlicet, ad tranquillum, designat, in quo et viso angelo
Domini percusus est in sinistro femore, atque ex uno protinus
pede claudicare cepit, quia, videlicet, in eodem transitu visuri
sunt pre solito deum suum hi quorum corda munda sunt, iuxta
id quod Dominus ait, «beati mundo corde quoniam ipsi deum videbunt»;
atque ex hoc marcescent in femore lingue, ut magis studeant
silere quam loqui, et ex pede active vite claudicare incipient,
ut vite contemplative, cuius maior est gloria, initantur.
38. Dicendum est aliquid de semine Abrae, quod vocatum est
Israel. Descendit utique Iacob in Egyptum, mansitque in illa, quadringentis
annis, quibus completis, in brachio forti et extento
egressi sunt de Egypto, erraveruntque per desertum quadraginta
annis, percuso pharaone et exercitu eius. Quibus completis, item
et eisdem qui de Egypto egressi fuerant deficientibus in deserto,
novissime, transmisso Iordane, pervenerunt in terram fluentem lac
et mel. In his intelligentie multe sunt, sed nos e multis
unam suscipere in hoc loco sat est, ut ad alia festinare possimus.
39. Descensus Israelis in Egyptum humiliationem designat
eiusdem populi qui a fidei libertate pertinentis, a montana Ierusalem
descendere ad servitutem legis, ingruente ubique fame,
compulsi sunt, ut saltim sub legis honere substentarentur scripturarum
cibariis, quia nusquam scriptum aliquid de verbo Dei in
gentibus reperiebatur, eo quod validissima fames universum genus
humanum invaserat, ut discerent non alta sapere, sed humilibus consentire.
|
|