Pag 130

siue per k scribantur, nulla differentia est nec in sono nec
in potestate eiusdem consonantis.
38. De q. Q litteram nec Greci resonant nec Hebraei.
Exceptis enim Latinis hanc nulla[m] alia lingua habet; unde
et ipsa superuacua est uocata, quoniam per c cuncta ueteres
scripserunt. Q etenim nisi eandem uim haberet quam c,
numquam in principiis infinitiuorum et interrogatiuorum quorundam nominum per obliquos casus in c litteram transiret,
ut quis cuius cui. Similiter a uerbis q habentibus in
quibusdam participiis in c transfertur, ut sequor secutus,
loquor locutus.
39. Q quare consueuit scribi. Q autem quibusdam
propter nichil aliud uidet<ur> scribenda esse, nisi
ut ostendat sequens u ante alteram uocalem in eadem syllaba[m]
positam perdere uim litterae in metro. Quod si
ideo alia littera est extimanda q quam c, debet g similiter,
cum praeponitur u amittenti uim litterae, alia putari, et alia,
cum id non facit. Dicimus enim anguis sicuti quis et augur
sicubi cur. C igitur et k et q licet nomine et figura differant,
unum sunt potestate.
40. Quare dicantur mutae. Mutae autem dicuntur, non
quod omnino mutescant, sed quia ad comparationem bene
sonantium exiguam uocem tenent. Sic etiam informis mulier
dicitur, non quod omnino forma careat, sed quia male est
formata.
41. Vnde incipiant et quomodo finiant. Mutae itaque a se
incipiunt et in e uocalem desinunt, ut be ce, praeter k quae
desinit in a, et praeter q quae finitur in u.
42. De y et z. A Grecis duas litteras mutuauit Latinitas,
y et z, propter nomina Greca. Istae namque, uidelicet y et z,