2. Natus est homo in mundum, patriarcha nobilis,
Abraham dei amicus, puer fidelissimus.
Heber aurea de stirpe oriundus extitit,
a quo coepit Hebreorum diffamari populus.
3. Huic sterilis beata Sarra sanctum peperit
filium, cui nomen dedit bonus dei angelus.
Clausus adhuc uulua matris Isaac uocatus est,
quem in dei holocaustum pater iustus obtulit.
4. Hic Rebecca de coniuge Iacob, sanctum domini,
habuit prolem, quem deus dilexit in specie.
Hic duodecim quaternis genuit de matribus
filios, a quibus gens est Israhel lectissima.
5. Qui beatus patriarcha filium carissimum
genuit in senectute, Ioseph nomen indidit,
quem dilexit super omnes natos singulariter.
Hic paternam releuabat senectutem iugiter.
6. Fecit illi pater suus tunicam talariam,
uario polimitoque contextam de stamine.
Erat pulcher in aspectu, uenustus in specie,
liliis ad instar nitens, roseus ut rosula.
7. Hic in nocte soporatus presagum per spiritum
uidit somnia, que patri fratribusque retulit,
quae inuidiae tulerunt dictis seminarium
odiique cum liuore ministrabant fomitem:
|
|