servata in omnibus moderatione decenti, ut interpres animi vultus etiam reputetur. (9) Similiter gestus quidam moderati sunt aliquando adhibendi, extendendo manus, erigendo pedes, inclinando cervicem et similia faciendo que videantur ad materiam pertinere, dum modo nichil in horatore generent inhonestum.
Unde ait Gaufredus:
59. (1) VERSUS DE TRIPLICI PRONUNTIATIONE.
(2) "Vox vocem, vultus vultum gestusque figuret
Gestum, per notulas hec est moderata venustas
Auditum pascat vox castigata modeste
Vultus et gestus gemino condita sapore".
(3) Hec de inventione, dispositione, elocutione, memoria et pronuntiatione breviter dicta sufficiant, quia non de causis civilibus sed de his que magis operi nostro expediebant habuimus propositum pertractandi. Tandem ad usum exordientium quasdam generales sententias secundum ordinem alfabeti duximus subiungendum, hoc modo:
60. (1) TRACTATUS GENERALIUM SENTENTIARUM PER ORDINEM LITTERARUM .
(1) Adquisitio que honestati non obviat est laudanda.
(2) Alienum est a gratia donum diutius expectatum.