|
+ In nomine Sanctæ et individue Trinitatis. Robertus divina favente
clementia Normannorum, Salernitanorum, Amalfitanorum,
Surrentinorum, Apuliensium, Calabriensium atque Siculorum dux.
Nos ab omnium conditore dignas mercedes credimus acepturos
si sanctis ac venerabilibus locis curam et sollicitudinem impenderimus,
et quod ab eorum cultoribus postulati fuerimus in eisdem locis
prout possumus adimpleamus. idcirco amore et timore ipsius
conditoris ac nostris redemptoris compulsus, qui pro salute nostra
carnem sumere et patibulum crucis subire non dedignatus est ut
nos a morte liberaret et perpetuam vitam tribueret, et pro salute
gentis ac patriæ nostræ, et per interventum domnæ Sichelgaite coniugis
nostræ concedimus in monasterio Sanctæ et individue Trinitatis
quod constructum est foris hac nobis a Deo concessa Salernitana
civitate in loco Metiliano, cui videlicet monasterio domnus Petrus
venerabilis abbas preest, integram ecclesiam Beati apostoli et
euvangelistæ Mathei nobis pertinentem, que constructa est in plaga
montis loci Nuceriæ in cuius montis cacumine rocca Sancti Cirici habetur,
cum omnibus stabilibus et mobilibus ipsi ecclesie pertinentibus
in quibuscumque locis. ea ratione ut hoc totum et integrum
quod ut dictum est concedimus semper sit in potestate prefati domni
abbatis et successorum eius et partium ipsius monasterii, et ille
et successores eius et pars ipsius monasterii licentiam habeant de
eo facere quod voluerint. et concedimus etiam in eodem monasterio
ut, si quis hominum nostræ terræ cuiuscumque sexus vel condicionis
pro salute animæ suæ de rebus suis stabilibus vel mobilibus
in prefato monasterio offerre seu alio modo largiri voluerit, potestatem
habeat qualiter voluerit omni publica requisitione et contradictione
remota; et, si quis liber etiam homo monachus fieri voluerit,
licentiam habeat cum omnibus rebus suis in eodem sancto
monasterio se offerre et tradere qualiter voluerit, et quod in eodem
monasterio oblatum seu quolibet modo datum paruerit semper
ipse domnus abbas eiusque successores et pars istius monasterii
securiter habeat et ex eo quod voluerint faciant et neque a nostris
iudicibus, comitibus, gastaldeis neque a quibuscumque auctoribus
nostræ reipublice habeat ex hoc quod in ipso monasterio ceu
supra legitur concedimus ipse domnus abbas eiusque successores
et pars ipsius monasterii quolibet tempore aliquam contrarietatem,
sed im perpetuum securiter illud habeant et faciant ex eo
quod voluerint. Hoc autem factum est tertio anno regni principatus
Salerni Roberti ducis. textum vero huius nostræ concessionis scribere
precepimus tibi Ursoni nostro notario. anno dominicæ incarnationis
millesimo septuagesimo nono, mense iulio concurrente indictione
secunda.
SP
| |