|
421.
Henricus sextus divina favente clementia Romanorum imperator semper augustus
et rex Sicilie. Notum facimus universis nostri imperii fidelibus presentibus et futuris,
quod nos adtendentes devota obsequia fidelium nostrorum Alberti, Mathei et Guilielmi
filiorum Rainerii de Monteacuto, ipsis et heredibus eorum forum in Castilione, in
quarta feria, imperiali auctoritate concedimus et confirmamus; ut forum idem manuteneant
et defendant; precipientes quod nullum aliud fiat cum ipsa die, quod iamdictum
impediat forum. Insuper ipsi Matheo clementi benignitate indulgemus, ut domum
suam quam habet in castro Citerne pro suo velle mutet et edificet; nullaque persona
humilis vel alta, secularis vel ecclesiastica ipsum in hoc impedire vel molestare audeat.
Quod si quis attemptaverit triginta libras auri sub pena componat, vel predictam nostram
concessionem vel fori confirmationem perturbare seu molestare presumpserit, sub
illa eadem pena se cecidisse cognoscat; medietatem camere nostre, reliquam passis
iniuriam. In cuius rei notitiam presentem cartam inde scribi et maiestatis nostre sigillo
iussimus communiri. Datum apud Castellum Clusinum, anno Domini M. C. lxxxxvi,
indictione XIIII, idibus octobris.
| |