|
431.
Pio patri et domino Innocentio divina gratia sancte Romane ecclesie summo pontifici,
R(ainerius) Castellane ecclesie humilis servus, et Bonuscomes Civitatis Castelli
potestas, cum eiusdem terre maioribus et minoribus debiti obsequii devotissimum famultatum.
Cum pristina memoria terra nostra, immo vestra, ad patrimonium sancte Romane
Ecclesie communi ac privato iure spectare noscatur, et nuper sanctitatis vestre
solicita cura antiqua statuta inde sint innovata, dignum duximus ad presens debitum
canonem, scilicet per unamquamque domum denarium, colligere et in signum nostre
fìdei per presentium latorem nobilem virum ad pedes vestre sanctitatis dirigere: cuius
facti humilis devotio nos corroborat, etl in quibus indigemus a sanctitate vestra protectionem
querere confortat. Aretini cives nobis aliis proximiores Castellani episcopatus
fines invadere conantur, et cum Marchionibus confederati qui contra preceptum vestrum
de destructione Montis sancte Marie acriter doluerunt, aliud castrum Castellane ecclesie
expugnare et memoratum Montem, post Pascha, reficere ordinaverunt. Subveniat ergo
famulis suis vestre saactitatis benignitas, et iamdictos Aretinos ab huiusmodi vexationibus
imperiose compescat; et adiacentes vicinos, scilicet Perusinos et Massanos, ut
nobis subveniant vestre paternitatis providentia, si placet, inducat.
| |